Fl-okkażjoni tal-Jum Dinji tas-Saħħa Mentali, Dr Lydia Abela, b’kollaborazzjoni mal-Gvern ta’ Malta, se terġa’ ttella’ il-festival NITKELLEM għat-tieni sena konsekuttiva. L-edizzjoni ta’ din is-sena se ssir nhar id-9 u l-10 ta’ Ottubru, u se għandu l-għan li jkompli jqajjem kuxjenza u għarfien dwar is-saħħa mentali fis-soċjetà.

Fost l-ambjent kalm u seren f’Ta’ Qali, il-Park Nazzjonali se jkun qed jilqa’ l-attivitajiet kollha mħejjija għal dawn il-jumejn. Spazju fejn wieħed jista’ jieqaf ftit, jirrifletti u jerġa’ jingħaqad miegħu nnifsu u ma’ dawk ta’ madwaru.

Matul dawn il-jumejn, il-programm se jkun qed joffri varjetà wiesgħa ta’ diskussjonijiet, attivitajiet ta’ benesseri, mużika u wirjiet kulturali. NITKELLEM għandu l-għan li jħeġġeġ djalogu miftuħ, jeradika l-istigma u joffri għodod prattiċi maħsuba biex isaħħu r-reżiljenza u jgħinu biex tinbena soċjetà dejjem aktar solidali u ta’ appoġġ.

Din l-inizjattiva se tkun qed tlaqqa’ flimkien professjonisti, organizzazzjonijiet, attivisti, studenti u l-komunità inġenerali biex lkoll flimkien jirriflettu fuq l-importanza tas-saħħa mentali, jesploraw approċċi preventivi u jenfasizzaw ir-rwol tal-moviment, l-arti, il-kultura u l-benesseri ġenerali biex nibnu ħajja dejjem aktar b’saħħitha.

Kelma Kelma Nota Nota se terġa’ tippreżenta produzzjoni oriġinali, Ixgħel l-indicator, immexxija minn Ray Calleja, Daniel Cauchi and the Big Band Brothers, u Michael Spagnol.

Kulħadd huwa mistieden biex jattendi u jieħu sehem f’dawn il-jumejn t’attivitajiet speċjali.